مش قادر أنسي صحابي اللي إتخانقوا مع بعض ووصلت بيهم الدرجة إن واحد فيهم طرد التاني من بيته وقاله مش عايز أعرفك تاني، ولما رحت أسئله عن اللي حصل عشان أحاول أوفق بينهم تاني وأحاول أرجع المايه لمجاريها قالي مافيش حاجة شدينا شوية بس مع بعض، أقوله أيوا شديتوا إزاي يعني فهمني يقولي شد يا عم عادي الشد العادي بين أي إتنين صحاب!
قولتله والشد ده يعني يخليك تقاطعه كدة وترفض تنزل تقابله! قالي سيبني بس لوحدي اليومين دول وخليك إنت معاه.. رجعت أسئل صاحبي التاني علي نوع الشد ده اللي مش عايز يقولهولي هو ده راح قايلي بقي أخيرًا كل اللي حصل، وقالي إنه إتخانق معاه في بيته وقاله مش عايز أعرفك تاني وطرده!
بتقول إيه! كل المصاييب دي يبني عملتها فيه! ده الراجل ماقاليش حاجة غير إنكوا شديتوا مع بعض بس وقعد يحلف مافيه غير كدا! لقيت دموعه نزلت وقعد يقسم إنه ماكنش في وعييه وهو بيعمل كدة وإنه كان متخانق مع كل اللي في البيت قبل مايجيله هو وللأسف كل اللي جوايا طلع عليه! قومنا في ساعتها طلعناله علي البيت فتحلنا دخلنا ودخل أوضته تاني ورفض برضه يتكلم معاه، راح صاحبي رايح وراه علي الأوضه ومسكله المصحف وحلفله إنه ماكنش في وعيه وهو بيعمل كدة وطلع مشي ومافيش يومين وكانوا راجعين أحسن من الأول تاني..
الإتنين دول ببعتبروني أقرب الناس ليهم ورغم كدة كنت هبوس رجلهم عشان أعرف إيه اللي حصل بينهم بالظبط لكن مافيش ويوم ما حصل وعرفت كان من الشخص الغلطان صاحب المشكلة! هما دول الصحاب وهي دي المواقف اللي بتبين الصحاب مش مواقف الهلس والضحك وقعدات القهوة والصور السيلفي!
الصاحب اللي مهما حصل ومهما جري عمره مابيعري صاحبه قدام حد، مهما كانت درجة الحد ده إيه بالنسباله حتي لو كان أبوه! الصاحب اللي يوم ما يتقطع الود بينه وبين صاحبه بيفضل محافظ علي ماتبقي منه! الصاحب اللي خصامه هجر مش فجر!
التعليقات على الموضوع