من الحاجات اللي بنختلف عليها أنا وماما إني لما اتزوج إن شاء اللّٰه مش هدخل حد يلف في شقتي زي المتحف السياحي، عشان دا بيت وله حُرمته، والضيوف ليهم مكان مخصص يقعدوا فيه ياخدوا واجبهم وضيافتهم ويمشوا واللي يزعل هو حر وماما شايفة إن دي عادة المجتمع ومينفعش اعمل كده عشان الستات هيطلعوا يتكلموا وحش عني وكده اللي هو يتفلقوا أصلًا، مش مشكلتي يعني! طالما مقصرتش في واجبهم كَضيوف ولا تخطيت حُرمات اللّٰه يبقى محدش له حاجة عندي.
افتكر مرة كنت بزور واحدة حبيبتي جدًا بعد زواجها لاقيتها بتقول لي تعالي افرجك على الشقة، قولت لها لأ أنا اخري أكل جاتوه وبس مبتفرجش على شقق حد المهم شوفتك واطمنت عليكِ وربنا يسعدك إنتِ وزوجك وتتهنوا ببيتكم لاقيتها زي اللي كانت هتعيط ونفسها صُعبت عليها وفضلت تدعِ لي وبتحلف باللّٰه إن الضيوف النساء يعني "عايزين حش رقبتهم واللّٰه" كانوا بيدخلوا غرفة النوم يتفرجوا عليها ويفتحوا دولابها عشان يتفرجوا على لبسها ومستلزماتها الخاصة، وبيناقشوها في اللي هي جيباه واللي هي مجبتهوش!
اللي هو تعالوا خدوا اللي إنتوا دفعتوه يا جماعة طالما حاجة العروسة مش عاجباكم! واللّٰه حاجة غُلب! من المفترض إن شرع اللّٰه عز وجل فصص كل مسألة بتفصيل دقيق جدًا ومسابش أي تفصيلة، موضوع بقى فُرجة الضيوف على الشقة ويفضلوا يعجنوا في كل أوضة شوية ومتعرفيش أصلًا اللي واقفة قدامك دي قلبها فيه إيمان باللّٰه ولا لأ وهتحب لك الخير ولا لأ، يعني ممكن هي تمشي من هنا والبيت يولع من هنا عادي واللّٰه حصلت وشقة عرسان جُداد ولعت واتفحمت ومحدش عرف السبب، والعين حق ورب الكعبة، والموضوع مش بيقتصر على الحسد وبس هو سبب من ضمن الأسباب لكن مفيش أي مُبرر منطقي يخليني أتقمص دور المرشد السياحي وألف مع الضيوف أفرجهم بيتي شبر شبر عشان أنا عروسة جديدة، نعم يعني!
عادات المجتمع مش قرآن ويجوز جدًا عدم العمل بيها وضربها عرض الحائط، طالما هتسبب لي أذى مادي ومعنوي، والمفروض إن الضيوف رايحين يباركوا مش يعاينوا الشقة ويعدوا جهاز العروسة وهتحصل حاجة من اتنين يا إما هيستكتروا عليها بيتها ونعمة ربنا وفضله عليها، يا إما هيعزوها في حالها ويا عيني يا بنتي مجبتيش كذا وجهاز قُليل وبيتك صغير وحاجتك رخصية، يبقى ليه من الأول ؟
المفروض بنروح نهني وندعِ بالبركة ونمشي خُفاف ظُراف كده، متبقوش بلاء يا جماعة.
شقة_العروسة_مش_متحف
منقول
التعليقات على الموضوع