قصة المستوصف 🙄
« المستوصف »
فتحت عيني ببطئ .. سامع صوت جهاز قياس نبضات القلب .. بيصفر بأنتظام ..
حاولت اقوم من مكاني .. لكن ايدي ورجليا مُكبلين بالسلاسل
بصيت حوليا .. فيه شخص واقف في أخر الاوضة .. قدام سرير .. وماسك مشرط وبيعمل حاجة قدامه ..
لابس بلطوه الدكاترة .. وفي حد واقف قدامه لابس نفس لبسوه وماسك صينية
بصيت حوليا .. اوضة واسعة ، فيه براويز متعلقة كتير ودم متجلط على الحيطان !!
حركت ايدي ورجلي فصدر صوت من السلاسل انتبه لي الاتنين الدكاترة دول !!
الي كان ماسك المشرط سابه .. والي كان ماسك الصينية رماها في الارض !
قلعوا الكمامات وظهرت ملامحهم .. الي كان ماسك المشرط ملامحه عجوز اوي .. راجل حوالي ستين سنة .. والتاني راجل كبير .. يعني حوالي خمسين سنة كدة
اتكلم الراجل الي عنده حوالي خمسين سنة :
- هنعمل ايه يا حامد .. الواد فاق ..
حاسس اني سكران .. شايف كل حاجة مُذبذبة ! ، اتكلم حامد - الرجل العجوز - :
- متقلقش يا سيد ...هو تحت انسحاب المورفين .. هو مش حاسس بحاجة دلوقتي .. هنخلص الجثة الي شغالين فيها ديه .. ونخش عليه
عايز اتكلم لكن لساني تقيل .. بصيت ناحية الجثة الي كانوا بيشرحوها فشفت كتلة من اللحم والدم .. شايف على الترابيزة الي جنب الجثة برطمانات مليانة سوايل ..
رغم المورفين الي بيقول انه فيا .. الا اني حاسس بكل حاجة .. وعارف اني مخطوف .. وعارف انهم تجار اعضاء بشرية .. لكن الي ميعرفهوش عني ان بشرب مخدرات فالمورفين ميأثرش تأثيره الكبير عليا انا ..
زي ما قلت البرطمانات ديه فيها سوايل .. الموجود في السوايل ديه أعضاء .. اعضاء بشرية !!
مشي سيد و حامد الي عرفت اسمهم لما اتكلموا مع بعض وراحو يكملوا تصفية في البني آدم ده !!
بصيت جنبي شفت اخر السرير الي انا فيه حديدة ملزوقة بخشب السرير وفيه فاصل هواء بينها وبين السرير
انتهزت الفرصة دي .. ومديت ايدي المُكبلة في السرير ناحيتها فخرجت ايدي بسرعة .. قمت براحة وخرجت رجلي الاولى من غير صوت وكذلك التانية ..
انا عارف المكان ده ! .. ده مستوصف البلد بتاعتنا !!
مأصدرتش صوت ونزلت ببطئ
مشيت على اطراف صوابعي ناحية الباب .. وغصب عني اصدرت صوت .. فبصولي هما الاتنين بدهشة !!
استغليت دهشتهم وجريت ناحية الباب وفتحتوه وجريت !!
كنت بجري في ممر واسع حوليا كراتين كتير .. النور خافت وضعيف .. سامع صوتهم ورايا وسامع
اصوات رجليهم بتدب في الارض .. المورفين مخليني شِبه مش واعي .. ومخليني ابطئ في الجري .. قدامي باب مكتوب عليه « EXIT » .. بحاول اجري وواخرج .. لكني حسيت بضربة قوية على دماغي وقعتني في الارض !!
* * *
فتحيت عيني !!! انا نايم على السرير الي كنت نايم عليه .. وقدامي الاتنين الدكاترة .. واحد ماسك صينية والتاني مشرط ، والي ماسك مشرط بيعمل حاجة فيا ..
رفعت وشي لقيته بيفتح بطني وبيخرج منها الكلى !!!
بعدها طلع حاجات كتير متشابكة ورماها على الارض !!
سمعت صوت مواء قطة من تحت فبصيت تحت لقتها بتاكل في الحاجة الي رماها ديه !!
مش حاسس بأي آلم .. هل بسبب المورفين .. لا عشان ده حلم ؟
صحيت ! .. كان حلم ، بصيت على بطني لقتها زي ما هي ، مش مفتوحة ، والاتنين الدكاترة دول مش موجودين ..
فجأة انفتح الباب وظهروا من وراه .. لكن كانوا لابسين حاجة زي قناع حديدي خارج من انبوب متوصل بحاجة متعلقة في ضهرهم .. واحد منهم ماسك كتاب ، والتاني بيشد ترابيزة عليها حاجة زي مربع زجاجي وفيه فار !!
راقبتهم .. الي ماسك الكتاب قفلوا وحطوا على ترابيزة .. وقرب من المربع الزجاجي .. وفتحوه ومسك الفار ..
الفار كان ميت او متخدر .. مكنش بيتحرك ..
مسك إبرة .. وبسنها غرزو في رقبة الفار وسحب دم منه .. دم اسود !!
وقرب مني !!
حاولت اتحرك لكنهم مكبلني جامد في السرير .. حركت دماغي يمين وشمال لكنه مسكها بأيدو جامد .. وغرز الإبرة في رقبتي .. وفرغ الدم فيا !! ..
---
بُتبع ..
انتظروا الجزء الثاني❤
التعليقات على الموضوع