قصة❤ عصابات المافيا❤

وأخيرا وبعد طول انتظار تحقق حلمي بالسفر الى أمريكا  أو تحديدا الى نيويورك
وها أنا بالفعل أستمع إلى الجملة المنتظرة ( الرجاء من السادة الركاب ربط أحزمة الامان )
لم أستطع حجز تذكرة على الخطوط الامريكية بالكاد استجمعت ثمن تذكرة على خطوط أقل في السعر
دعوني أولا اعرفكم بنفسي .. أنا مالك عبدالغني .. شاب في أواخر العشرينات .. تخرجت من كلية الهندسه قسم الميكانيكا
لقيت مشاكل كتير بعد ما اتخرجت أولهم اني مش لاقي شغل .. فضلت في البيت أربع شهور واستغليت الفترة دي اني اخد كورسات في الانجلش عشان كان حلمي أسافر برة من زمان ... واخيرا بعد ما لقيت شغل فضلت أحوش عشان اسافر ..انا من اسرة متوسطه الحال الحمدلله
بس مش هيقدروا يسفروني بره .. المهم مع البحث المستمر لقيت ان امريكا عامله هجرة مجانيه بتفتح كل سنه من شهر أكتوبر وبتقفل او شهر نوفمبر .. فرحت أوي هقدر اهاجر ببلاش من غير مصاريف كتير المهم اروح هناك واشتغل اي حاجه لحد ما أعادل شهادتي والدنيا تحلو معايه المهم قدمت في الهجره المجانيه ولما النتيجه ظهرت اكتشفت اني ما كسبتش فيها
ناس كتير احبطتني وقالتلي محدش بيكسب فيها أصلا في ناس بتقدم بقى لها سبع وعشر سنين ومحدش بيكسب المهم ما استسلمتش قدمت فيها تاني وتالت ورابع وخامس .. وكل مره بفقد الامل وادخل في دوامة الشغل وامي بدات تميل عليا وتقولي مش هتتجوز بقى ولا ايه .. المهم زي اي حد بعد الجامعه ومع الشغل بدأت علاقته بصحابه تقل وبدأ يتعود على روتين الشغل والخروجات والفسح تتكرر وقعده القهوة والفرجه على ماتشات الدوري الانجليزي بقت هي منفذي الوحيد للمتعه
المهم في مرة وانا قاعد على القهوة بشيش ومستني صلاح يجيب جون لقيت ان عدى اسبوعين على نتيجه الهجرة قبل كده كنت بستناها قبلها بشهر واخش عالنت يومها عشان اشوف انا كسبت ولا لا بس بعد خمس سنين محاولات بقيت بارد جدا .. وطبعا كنت متوقع اني مش هكسب يعني .. فالمهم فتحت الموقع لقيتني كسبت قعدت مصدوم ومن الفرحه قومت اصرخ بصوت عالي واضرب بايدي على صدري والناس تبصلي ومستغربه من رد فعلي وخصوصا ان مافيش اي جون جه عشان افرح عشانه
فواحد بيسالني في ايه .. قولتله صلاح جاب جون .. الناس بقت تبصلي وتستغفر ربنا وانا عمال اطنطت زي المجنون وجريت عالبيت احضر شنطتي .. المهم ان بعد ما خلصت اجراءات سفري وعملت انتر فيو السفارة حجزت تذكرة وحولت بقية فلوسي لدولارات .. كان معايه ألفين دولار بالضبط مش عارف هيكفوني في نيويورك قد ايه ناس بتقولي ممكن اسبوعين .. بس انا كنتش قلقان لاني ممتاز في الانجلش مكنتش هغلب عشان الاقي شغل
حتى لو كشير في مطعم او جرسون او سواق اي حاجه يا جماعه انا موافق انا بحقق حلمي .. المهم نرجع لموضوعنا اللي كان احسن من لحظة السفر البنت اللي كانت قاعده جنبي انا في حياتي ما شوفتش الجمال ده .. انا اول مره اركب طيارة واعصابي بايظة اصلاً بس هي مبوظه اعصابي اكتر
المهم الطياره اتحركت وطارت فعلا وفكينا حزام الامان وانا الفرحة مش سيعاني .. وبعدها شميت ريحة الاكل حلوة اوي ودخلت عليه مضيفه وسالتني تحب تاكل ايه فراخ ولا لحمة .. كأي شاب دماغه شغاله حسبتها بسرعه في دماغي اللحمه اغلى من الفراخ فهطلب لحمه  فقولتلها لحمة قالتلي مافيش غير فراخ..انا استغربت الصراحة هي سالتني ليه طالما مافيش غير فراخ
المهم الرحله طويله وانا مبسوط مش عايز اشغل دماغي باي حاجه .. وبالفعل نمت وصحيت لقيت البنت اللي جنبي كل شويه تدخل الحمام وترجع وبعدها حسيت بهزه كبيره في الطيارة قلبي اتخطف بجد والناس صحيت والانوار اشتغلت كلها وعلامة حزام الامان نورت
كل الناس ربطت حزام الامان وانا حاطت ايدي على قلبي والطيارة بتتهزر جامد .......
============(الجزء الثاني )=================
كل الناس ربطت حزام الامان وانا حاطت ايدي على قلبي والطيارة بتتهزر جامد .. المطبات الهوائية كانت قوية جدا,شريط حياتي كله عدى من قدام عيني لحظات الفرحة والحزن كل الكعاناه اللي شوفتها في حياتي وحلمي للسفر لامريكا وان صحابي كان عندهم حق اني اعيش في بلدي وخلاص كل ده عدى عليا في ثواني .. لحد ما اخيرا المطبات خفت واكتشفت ان البنت اللي جنبي خايفه اكتر مني شكلها مش عربيه قولت يلا فرصة أجمد قلبي واتعرف عليها .. وبالفعل سالتها انتي كويسه قالتي انها تمام .. قولتلها انا مالك قالتلي انا اليكسندرا .. اسمها جميل أوي .. وهي أجمل المهم فضلنا نتكلم مع بعض وهونا على بعض صعوبة السفر ومن كلامها اكتشفت انها من اغنياء أمريكا و أول مرة تسافر مع الناس في طيارة لأنها دايما بتطلع في طيارة باباها الخاصة
انا مش عارف هي بتتكلم بجد ولا بتحور عليا بس انا قولت عادي مش فارقه .. فضلنا نتكلم لحد ما وصلنا ألمانيا وبعدها كملنا رحلتنا لنيويورك .. كنا بقينا اصحاب ساعتها  لكني اتكسفت أعرض عليها سكن او مساعدة ليا الاقي شغل.. هي بعدها قالتلي هبقى اساعدك وادتني رقمها وبالفعل اول ما وصلنا المطار خدت على وشي ساعتين تفتيش في المطار واستجوابات كتير لحد ما اخيرا طلعت بره.. وقفت تاكسي ودفعت فيه كتير على عكس ما توقعت وروحت على ( هوستيل -< مكان إقامه بأجر فيه سرير أنام عليه).. ببص على الناس حواليا في ناس كتير من افريقيا وناس شكلهم من أمريكا اللاتينيه وبعض الروسيين والصينين المهم السرير بيتفتح وتقدر تحط جواه الشنط بتاعتك وتقفل عليها بمفتاح.. و رغم الارهاق بس ماكانش جايلي نوم نهائي من الانبهار والسعادة اللي انا فيها
بعد ما أمنت على حاجتي خدت الحاجات المهمة في شنطه صغيره مربوطة بحزام على وسطي ونزلت.. الساعه كانت 8 بليل لفيت الشوارع وانا مبسوط بالانوار والزحمة في ناس من جنسيات كتير قولت اتفسح النهارده ومن بكرة ابدأ ادور على شغل اتعشيت في مطعم كويس حسيت اني أول مرة أكل برجر بالحلاوة دي .. بعدها رجعت على الهوستل ونمت بس كان السرير اللي جنبي في واحد من المكسيك أبيضاني وشعره طويل وجسمه كله أوشام ومربي سكسوكه طويله .. المهم أن شكله مريب وكل شويه يبصلي بصات غريبه خلاني قلقان لدرجه اني نمت وانا واخد شنطتي في حضني عشان ما تتسرقش
صحيت تاني يوم استنين دوري في الحمام خدت دش واستعديت للنزول وطلعت عشر نسخ من السيفي بتاعي ولفيت على المحلات والمطاعم والمولات والشركات واليوم كان جميل اشتريت اكل من السوبر ماركت عشان اكل المطاعم هيخلص فلوسي لانه غالي .. بعدها رجعت الهوستل وكان في انترنت مجاني اتصلت بأهلي مكالمة فيديو وطمنتهم ان كل حاجه تمام وقريب جدا هلاقي شغل .. أمي مع اني لسه سايبها أول امبارح بس أول ما شافتني عيطت وكنت حاسس اني عايز اعيط انا كمان بس تمالكت اعصابي لحد ما قفلت معاها .. ونمت وانا بفكر في مستقبلي هنا هيكون ازاي لحد ما أعادل شهادة الهندسه واشتغل بيها
عدى تاني يوم وانا بوزع السيفي بتاعي برده في كل حته وكذالك اليوم الثاني والثالث والرابع لحد ما الفلوس بدات تقل بشكل ملحوظ وانا بدات أقلق .. وفي يوم لقيت رقم بيكلمني على شريحتي الجديده رديت بلهفه لقيته مطعم عايزين جرسون يشتغل وافقت على طول وروحتلهم واستلمت شغلي تاني يوم .. طبعا ناس كتير تفكر ان ده عيب ازاي مهندس يشتغل ويتر .. بس الشغل مش عيب لحد ما الوضع يتحسن
مشيت تمام فالشغل بتاعي هوا شغل متعب بصراحه عمري مافكرت بصعوبه المهنة دي .. المهم في يوم جالي في المطعم ناس لابسين جواكت جلد و وفنلات بيضه وعضلاتهم بارزة بشكل يخوف ولقيت فيهم المكسيكي اللي بينام على السرير اللي جنبي في الهوستل قعدوا وطلبوا الاكل والمكسيكي ده عمال يبصلي ويكلم زمايله بلغة غريبه ويضحكوا كلهم .. بصراحه حسيت اني مخنوق بطريقه عمري ما حسيتها حتى أيام ماكنت عاطل وبدور على شغل ما اتخنقتش كده الدم بدأ يتحبس في عروقي ووشي بدأ يحمر .. لحد ما زميلي فرانك من البرازيل قالي شكلك مرهق ارتاح وانا هقدم الطلبات للطربيزة دي ..وفعلا دخلت غسلت وشي وشربت سيجارة أروق دمي لحد ما كلوا ومشيوا وبعدها خلصت شغلي ورجعت عالبيت
أول ما وصلت غيرت هدومي ونمت وانا بفكر يا ترى هستحمل قد ايه ..وبعدها افتكرت معاناة أهلي معايه عشان نحوش تمن التذكرة دي والفلوس اللي خدتها وصرفتها وقررت اني لازم استرجل لان اي مكان فيه مشاكل فلازم أكون مرن عشان ما اتكسرش .. لأن دي أخر فرصه ليا عشان أثبت نفسي وأحقق حلمي .. قبل ما عيني تروح في النوم لقيت المكسيكي دخل الاوضة وباين أنه سكران أنا قلقت أول ما شوفته .. بعدها طلع بره وفضل يقول كلام غريب فهمت منه كده .. أنه بينده صحابه وبالفعل كلهم جم
صاحب الهوستل وقف لهم عالباب ومنعهم من الدخول لان شكلهم مريب فعلا .. لحد ما حد فيهم عمل حاجه خلتني اقوم من سريري من الخضة ....
=============( الجزء الثالث )==============
واحد فيهم طلع مسدس وحطه على دماغ صاحب الهوستل بعدها الراجل سابهم يدخلوا انا مش عارف اعمل ايه .. انا حاسس اني مرعوب ومش عارف هروح فين هما واقفين عالباب .. بعدها لقيتهم جايين ناحيتي وكل الناس اللي معانا في الاوضه محدش اتحرك من مكانه حتى عشان يساعدني او يقف جنبي كله بص بعيد عني
المهم لقيتهم بيحطوا ايدهم في جيوبي فرحت ماسك ايده وبقوله عايز ايه.. لقيت اللي معاه المسدس موجهه على راسي .. ساعتها حسيت اني اتشليت للحظة خدو كل فلوسي وشنطتي وموبايلي .. وبعدها اللي معاه المسدس لف اداني ضهره..وبعدها لفلي بسرعه وقام بكل قوته رافع ايده وضربني بظهر المسدس على دماغي أغمى عليا ...
صحيت من النوم بعدها حاسس بصداع رهيب ووجع في راسي مش مخليني عارف افتح عيني كويس حتى فضلت دقايق استوعب انا فين وايه اللي بيحصل لقيت ست كبيره شكلها هنديه ماسكه معلقه اكل وبتوكلني حاجه تقريبا شوربة خضار بس طعمها غريب .. المهم ريقي ناشف وحاسس بجوع ودوخه ومش عارف مين دي بسألها بالانجليزي ترد عليا بلغة تانيه بس راكشنتها بتقول انها مش فهماني لحد ما لقيت صاحب الهوستل داخل علينا
صاحب الهوستل هندي اسمه سوياش .. عرفت منه اني بقى لي يومين عنده فالبيت بتعالج وفضل يعتذرلي انه مش هيقدر يبلغ الشرطه عشان الناس دي قتالين قتله وشغالين في عصابه مافيا كبيرة وكذالك ما ينفعش يوديني المستشفى عشان فيها سين وجيم .. فضلت طول اليوم عالسرير ودماغي مربوطة وكل شويه مراته تفك الشاش وتطهر الجرح وتربطه تاني .. عم سوياش نصحني نصيحه قالي انت لو اشتكيت للشرطه مش هتعرف تاخد حقق .. وانا قلقت برضه سرقوا باسبوري وحاجتي وفي المطار بهدلوني وانا ورقي سليم أمال لو روحتلهم دلوقتي من غير اي اثبات هيعملوا فيا ايه ؟؟ .. المهم فكرت وقررت اني استعوض ربنا في حاجتي وعم سوياش عرض عليا اسكن في بيته لحد ما اقبض الشهر بتاع الشغل واقدر اروح مكان اسكن فيه
وبالفعل بعد يومين رجعت الشغل بس اكتشفت انهم رفدوني عشان اختفيت 3 ايام وتلفوني مقفول حكيتلهم اللي حصل قالولي واحنا مش عايزين حد عنده مشاكل المطعم ليه سمعته .. طلعت وانا محبط مش عارف اعمل ايه .. لحد ما قررت ارجع ألف عالشركات والمحلات تاني لحد ما ألاقي شغل بس في نص اليوم دوخت من المجهود مع التعب فروحت ودماغي وجعاني بس وجعاني اكتر من التفكير فاللي جاي
المهم قعدت افكر لحد ما قررت أتصل بألكسندرا اللي قابلتها في الطيارة لحسن حظي من فرحتي بالرقم ساعتها كنت ببصله كتير لحد ما حفظته وفعلا خدت من سوياش موبايل واتصلت بيها بس ما ردتش اتصلت بيها أربع مرات وماحدش رد عليا برده .. روحت مرجع الموبايل وبعدها رن بصيت فالرقم لقيته هي .. رديت بلهفه وفكرتها بيا قالتلي فكراك وفينك ما اتصلتش بيا ليه تاني يوم .. المهم حكيتلها اللي حصل فتعاطفت معايه جدا وطلبت انها تقابلني
وبالفعل اتقابلنا في كافيه حلو .. وقالتلي انها كلمت باباها مستر مارك.. عشان أسكن معاهم في القصر وقالتلي انه هيشغلني معاه مساعد لحد ما يشوفلي شغل احسن انا واحد زيي فالوضع ده لو هشتغل اي حاجه بتجيب فلوس هوافق .. المهم هي حاسبت على المشروبات فالكافيه وعزمتني عالغدا وروحت بعدها وانا دماغي بتلف وكلمت اهلي عشان بقى لي فتره مش بطمنهم عليا وانا مخفف النور عشان ما يخدوش بالهم اني متعور وتعبان
روحت تاني يوم القصر ذهلت من المنظر ناس كتير لابسه بدل سودا ونظرات شمس وكلاب كتير واحد استقبلني وخدني لحد جوه قعدت في بهو القصر وفي نجف مدهب ولوح فنيه كتير وخدم في كل مكان انا رجلي واطرافي بدات تترعش من القلق بعدها لقيت راجل بشعر أبيض وبالطو اسود وماسك بايب داخل عليا ومعاه ألكسندرا
مديت أيدي عشان أسلم عليه ما بصليش حتى و قعد وقام مولع البايب الكسندرا شاورلتي عشان أقعد انا كمان ..قعدت وبعدها قالي انت بتشتغل ايه قولتله انا مهندس ميكانيكا ومستني شهادتي عشان تتعادل ..قاطعني قالي بتعرف تسوق قولتله أيوه .. قالي خلاص هتكون انت السواق بتاعي .. قالي بتعرف تستخدم السلاح .. اتوترت من السؤال بس قولتله ايوه انا دخلت جيش وبعرف استخدمه بس مش أوي .. قالي هنعلمك .. خوفت أسئل بصراحه ليه بس أكيد واحد غني جدا زي ده لازم يكون السواق بتاعه قادر انه يحميه .. قالي يلا روح مع جاكوب
ولسه هسأله مين جاكوب ؟؟ لقيت خيال جاي من ورايه ببص لقيت راجل أقرع بسكسوكه طويله ومظفرها وطوله قد عرضه راجل ضخم جدا مسكني من ذراعي وقام رافعني من على الكرسي لقيت نفسي واقف ولقيته بيجرني وهوا بيقولي تعالى معايه بصيت لالكسندرا لقيتها مبتسمه وبتوحيلي اني اروح معاه بصراحه القصر ده مافهوش حاجه تطمن غير الكسندرا .. روحت معاه في غرفة في حديقة القصر وقام مديلي بدله قالي البسها لبستها طلعت مقاسي وقام مديلي مسدس ايدي كانت بتترعش شويه بس الموضوع كان حياه او موت بالنسبالي اكون او لا اكون على رأي هاملت .. طلعت معاه بره وركبنا عربيه كهربا ومشينا بيها لحد ما روحنا ورى القصر وفضلنا ندرب عالنشان في مكان مجهز لضرب النار وفضل يديني نصائح عشان النشان يكون مزبوط وانا في قمة تركيزي ماهو مش معقوله يكون اللي بيعلمك في حجم جاكوب وانت ماتكونش مركز المهم مع دوشه ضرب النار والتركيز دماغي بدات تدوخ الاصابه لسه ماثره عليا لحد ما وقعت على الارض
صحيت بعدها لقيتني على سرير في غرفة كانها في الجيش حواليا ناس كتير على سرايرهم ومعاهم أسلحه وفي دكتوره جنبي بتكشف عليا بعدها ادتني حبايه وكوبايه مياه ..حسيت بعدها بشويه اني بقيت احسن لقيت جاكوب داخل الناس كلها وقفت قومت واقف قالي يلا البس عشان نازلين مع BIG BOSS  لبست بسرعه وركبت العربيه بعدها مستر مارك ركب ورى وجاكوب ركب جنبي وقالي اتحرك مشيت وطلع ورانا أربع عربيات جيب مليانه من خيرات شباب أمريكا
المهم جاكوب فضل يوصفلي الطريق لحد ما وقفنا عند بار كبير نزلنا وفضلت ماشي وراهم ..للحظات كده قعدت افكر انا بعمل ايه معاهم ..وايه اللي جبني هنا .. وليه ماقعدتش في بلدي وخلاص .. وصلت لمرحله اني بعمل اي حاجه وخلاص .. اي حاجه ماتخليش الناس في بلدي يشمتوا في تجربتي للهجره اي حاجه تجيب فلوس تعيشني وارد بيها الفلوس اللي استلفتها عشان اسافر واجي هنا ..وعشان ما اكسرش بخاطر اهلي .. المهم فوقت من تفكيري ده على اني انا وجاكوب ومستر مارك دخلنا غرفة وباقي الحرس وقافين بره دخلنا لقينا راجل شكله من أفريقيا ولابس بدله بيضا ودهب كتير قاعد على طربيزة مليانه خمور والغرفة مليانه بادي جاردز تبع الراجل ده
المهم بدأو يتكلموا برموز غريبه مش فاهمها لحد ما الراجل ده قام وجاب صندوق ابيض وفتحه مستر مارك بص فيه وبعدها قفل الصندوق وجاكوب أداله شنطه فتحها طلعت مليانه دولارات انا عيني زغللت اول ما شوفت كميه الفلوس دي .. بعدها سلموا على بعض ومشينا قبل ما نتحرك جاكوب قالي احفظ المكان ده عشان بعد كده هتيجي هنا لوحدك هزيت راسي بالموافقه ورجعنا عالقصر .. قعدت افكر فاللي حصل وبعدها نمت من التعب
تاني يوم على طول جاكوب اداني الصندوق وقالي على عنوان وجبته من على جوجل ماب عشان اتحرك عليه .. قالي روح ودي الصندوق ده لهناك خدت الصندوق وطلع معايه واحد تاني من رجالتهم وفي الطريق قالي استنى هنا كان عايز يشتري سجاير المهم اول ما نزل استغليت الفرصه عشان افتح الصندوق ده اشوف جواه ايه ولما فتحته اتصدمت صدمة عمري.. لما لقيت جواه .....
=========( الجزء الرابع والاخير ) ================
استغليت الفرصه عشان افتح الصندوق ده اشوف جواه ايه ولما فتحته اتصدمت صدمة عمري.. لما لقيت جواه قلب واكتشفت ان الصندوق من جوه بيحفظ درجة الحرارة .. للحظات ما بقتش عارف اعمل ايه بس فوقت على الراجل اللي معايه وهوا خارج من السوبر ماركت قفلت الصندوق واول ما ركب اتحركنا وصلنا لحد قصر تاني ومليان حرس من برة الراجل اللي معايه خد الصندوق وسلمه لواحد هناك وخد شنه تانيه كبيره اكيد دي شنطة فلوس خلصنا ورجعت عالقصر
قعدت في اوضتي شويه بعدها وزعوا علينا وجبات ماكنش ليا نفس اكل مش عارف اعمل ايه حاسس اني جيت اطلع من مصيبه دخلت في مصيبه تانية بعدها جالي اتصال من اهلي عشان كنت فاتح واي فاي الموبايل واضح انهم بيلبوا مني فلوس بس بشكل غير مباشر منا مش عارف اقولهم ايه كل الناس معتمده عليك مفكرين عشان انت في امريكا يبقى انت رايح معاك شوال بتعبي فيه دولارات ببلاش قولتلها قريب هبعتلكم فلوس وشهم نور عالكميرا ولقيت الفرحة ملياهم بعدها قفلت معاهم وفضلت افكر هعمل ايه في المصيبة دي
لقيت جاكوب جاي من بعيد قومت وقفت والناس كلها وقفت قالي ما كلتش ليه قولتله ماليش نفس ابتسم ابتسامه ليها معاني كتير وانا وشي احمر وبدات اعرق قولتله هاكل دلوقتي .. لقيته بيدني ظرف مليان قالي ده نصيبك ومشي فتحت الظرف لقيت دولارات بالهبل للحظة قلقت بس احساس الفرحة جوايا كان اكبر .. طول عمري ماشي صح وعمري ما خدت في ايدي مبلغ زي ده فضلت افكر شويه واستئذنت منهم اني عايز احول فلوس لاهلي
بس ما سابونيش اخرج لوحدي جاكوب قالي هاجي معاك انا كمان عايز احول فلوس ركبت العربية وجاكوب جنبي واتحركنا عالبنك وحولت لأهلي خمس ألاف دولار مبلغ ضخم جدا متاكد الحج والحجه ممكن يموتوا فيها من الفرحة وبقية الفلوس شيلتها في حسابي واضح ان اللي شغال في البنك تبعهم لانه ما سالنيش جبت كل الفلوس الكاش دي منين وجاكوب هوا اللي معرفني عليه وواضح ان جاكوب مش امريكي شكله من امريكا اللاتينيه بس ما رضتش اسئله انت منين ؟؟ خوفت يتعصب عليا
المهم خلصنا وبعدها سالني بتفهم في الموبايلات قولتله ايوه ليه ؟؟ قالي عايز اكلم ابني الصغير النهارده عيد ميلاده ... المهم فتحتله البرنامج واتصل باهله وانا نزلت من العربية لحد ما يخلص وشكله كان فرحان جدا وانا واقف بتلفت حواليا لمحت الشاب المكسيكي وصحابه داخلين بار قدامي للحظة استخبيت ووقفت الناحية التانيه من العربية خوفت يشوفوني بس جاكوب لمحني وانا بحاول استخبى بعدها خلص مكالمته ونزل من العربية وولع سيجارة وبصلي وقالي انت بتستخبى من مين ؟؟؟
قلقت بصراحة بس استلطفته وحسيت اني عملتله خدمة من شويه وحكيتله على اللي عملوه معايه في الهوستل قالي طب تعالى نتسلى شويه ونجبلك حقك لقيت جاكوب لف وفتح شنطه العربية وفضاها من كل حاجه وقام مطلع مسدسه ومجهزه وقالي تعالى بصراحه انا مش بحب المشاكل بس العيال دي هما السبب في اللي حصلي فلازم يبقى لهم نصيب من المشاكل دي
دخلنا البار سوى والواد المكسيكي لمحني قام ضاحك وشاور لصحابه واول ما جم يتحركوا ناحيتي انا قلقت بصراحه بس لقيت جاكوب سابقني راحوا العيال واقفين من الخضة بصراحه شكله يرعب اي حد المهم قعد يتكلم معاهم بالمكسيكي شويه بعدها العيال كلها جريت قومت ماسك فالواد المكسيكي وجاكوب قام ماسكه من قفاه وقام مطلعه معايه من الباب الخلفي للبار وبعدها جاكوب قام مكتفه وانا انتهزت الفرصه وبدات اضرب فيه بكل قوتي لحد ما الواد تقريبا اغمى عليه لقيت جاكوب شاله على كتفه وقالي تعالى وحطه في شنطه العربية وقالي اتحرك عالقصر ..
اول ما وصلنا شاله من الشنطه وتقريبا كان بدا يفوق ويحاول يرفص بس جاكوب كان ماسكه كويس ودخلنا القصر ونزلنا غرفة تحت لقيت ناس لابسين بالطوهات بيضه شكلهم دكاتره قلبي بدا يتقبض قولت لجاكوب احنا رايحين فين ؟؟ ماردش عليا فضلنا ماشيين لحد ما دخل غرفه الدكاترة قامت وقاموا ماسكين الواد المكسيكي وربطوه على السرير وأدولو حقنه وبعدها جاكوب قالي يلا بينا بصيت عليه قبل ما اخرج والواد فاق وقعد يرفص ويصرخ ويبصلي ويعتذرلي ويبكي بصوت عالي والدكتور جايب سكينة تشريح ولبس الكمامه ومستنيني اخرج انا وجاكوب وانا مذهول بعدها لقيت جاكوب سحبني من ايدي لحد ما طلعني بره
طلعت انا وهوا بره القصر في الجنينه وقام مطلع سيجارة ملفوفه وشربها قالي مبروك انت كده خدت حقك وجبت شغل .. قالي انت وشك حلو وانا خلاص كده بقيت رسمي مجرم جاكوب حس اني مدايق قالي خد اشرب انا مافكرتش بصراحه مع اني مابشربش الحاجات دي بس اول ما عزم عليا ما فكرتش قومت واخد منه وشارب اي حاجه تنسيني انا مين وبعمل ايه .. لحظات كده ولقيت جاكوب بيضحك جامد وبيبصلي بيقولي شوفت الواد كان بيصرخ ازاي من الخوف ويضحك بشكل هستيري انا بصيتله بكل برود وعايز اقوله انت ماعندكش رحمة ولا قلب
بس دا اللي جوايا اللي طلع مني خلاني استغرب نفسي بالكامل لقيتني بضحك انا كمان بضحك من كل قلبي بضحك بطريقة عمري ما عملتها كنت مستمتع جدا ورايق مدايق من جوه ومش عارف ابطل ضحك وقعنا على النجيله انا وجاكوب من الضحك ومش قادريين نبطل فضلت نايم عالنجيله وببص للشمس وهي بتغرب وانا بفكر انا ممكن اجيب فلوس قد ايه طب لما ارجع بلدي هجيب عربية شكلها ايه .. هشتري شقة جديدة اكيد في حي راقي واسيب بيتنا اللي في منطقة شعبية هكلم صحباتي بتوع الجامعة اللي كنت بخاف اخرج معاهم عشان هما ولاد ناس وفلوسهم كتير واماكن الفسح بتاعتهم غاليه خلاص انا بقى كل تفكيري هجيب فلوس قد أيه بصيت لجاكوب وانا كل داعمال اتخيل احلامي وقومت بايسه على خده بصلي كده وبرق انا قلقت ..ايه اللي انا عملته ده قام فاتح في الضحك الهستيري تاني وهوا بيضرب فيا وانا قومت ضاحك انا كمان حاسس ان كل القيوض والهموم بتنزل من على كتافي مع كل ضحكة .. كل المبادئ والاخلاق والانسانية بتقع من قلبي وتفكيري مع الضحك قلبي بيموت واحده واحده جايز من تاثير البتاع الي انا شربته ده .. طلع الشيطان اللي جوايا وموت ضميري
طول عمري شايل الهم كفايه بقى عملت كل اللي اقدر عليه هفضل عايش عالمبادئ طول عمري خليني استمتع بحياتي واحنا بنقتل وبنتاجر باعضاء مين ماهما ناس يستاهلوا القتل زي الراجل المكسيكي ده بالعكس انا بعمل خير مش شر انا بنقذ البشرية كلها من الاشرار انا المطهر انا قاضي العدل في ارض الظلم انا انا انا انا .. انا مش عارفني انا توهت مني انا مش انا
واضح ان الدماغ بقت عاليه قوي مش عايز افصلها سالت جاكوب معاك قد ايه من السجاير الملفوفه دي بصلي وضحك وقالي كتير قولتله عايز منها بالفعل اداني منها علبه كبيره وقالي يلاننام عشان عندنا مشوار مهم الفجر دخلت نمت احلى نومه في حياتي وصحيت وبدات شغل وكان عباره ان جاكوب مقسم الرجاله ناس بتخطف مشردين عشان نتاجر باعضائهم وناس بيتاجروا في الاسلحة والمتفجرات وناس بتاجر في المخدرات والهروين غير بيوت الدعارة والقمار شبكة كامله بيقوضها مستر مارك كل قطاع ماسكه ليدر وقائد وكان قائد تجارة الاعضاء هوا جاكوب حاسس اني محظوظ اني شغال معاه طيب جدا وبيحب عياله ودايما يحكيلي عنهم بس الشغل شغل
طبعا الكلام ده لو بقوله وانا فايق كنت هنتحر بس الشكر كله للسجاره الملفوفه اللي من ساعة ما جربتها وانا مش بشيلها من بقي غاليه رخيصه مش مهم انا معايه فلوس كتير اوي اوي وبحول لاهلي فلوس كتير لدرجه بداو يشكوا فيا فقللت الفلوس اللي بحولها عليهم انا مفهمهم اني حضرت الدكتوراه وبقيت دكتور في الجامعة وشغال في وكالة الفضاء ناسا عشان يقتنعوا بكميه الفلوس دي طبعا الحج متعشم اني بقيت زي دكتور أحمد زويل وعامل فرح فالمنطقه لحد ما هيفضحني بس مش مهم المهم انهم مبسوطين مني ومش شايل همهم انا كده مبسوط اللي عايزة بجيبه
اتسحلت في الشغل مع جاكوب لمدة سبع شهور معرفش انا اتسببت أو شاركت في قتل كام واحد ومش بفكر ومش عايز أعرف ومش عايز أفوق لحد ما في مرة جالنا ضيف القصر وشكله حد مهم جدا وواضح انه كان من دول الاتحاد السوفيتي المهم دخلت انا وجاكوب والراجل كان ليه اغراض وفضل يتكلم عن مخططات كبيره اوي اول مرة احضر حاجه من دي معاهم الظاهر اني بقيت مصدر موثوق فيه
المهم كانت القعده عاديه بالنسبالي لحد ما قال انه هيعمل تفجيرات متتابعه في عدة دول وعايزنا ننفذها لحد ما ذكر بلدي انا اتوترت بصراحه وبعدها شربت كاسي وطلعت بره في الجنينه اشرب سيجارتي الجميله وانسي اي حاجه مش عايز اشغل بالي بعدها بنص ساعه جاكوب جالي وقالي مستر مارك عايزك رميت السيجاره ودخلت ولقيته بيقولي انه بيثق فيا جدا وعايزني اعمل مهمه محدش في رجالته يعرف يعملها لاني العربي الوحيد ومن نفس البلد اللي فيها المهمة دي
قالي انت هترجع بلدك كان رايح تشوف اهلك وبعدها في حد هيقابلك يديك قنبله هتزرعها في مكان هناك وبعدها هتشغلها وتبعد عنها وهي هتنفجر في خلال دقيقة .. قولتله انا مبسوط هنا ومش حابب ارجع بلدي دلوقتي وفي شغل كتير بعمله انا وجاكوب ساعتها لقيت بوكس جاي في وشي من جاكوب وقعني على الارض للحظة كده حسيت اني كنت بحلم وصحيت من النوم .. جاكوب اللي كنت مفكر اننا بقينا صحاب وعشرة شوفت في عينه انه ممكن يقتلني دلوقتي عادي ..بعدها جه جاكوب ورفعني من على الارض ومستر مارك بيبصلي بعيون حاده وقالي طيارتك هتطلع الصبح يلا روح جهز حاجتك وهنتصل بيك وانت هناك نقولك مين هيديك القنبله
قولتله حاضر ومشيت اجهز حاجتي وانا بفكر هعمل ايه .. بعدها لقيت جاكوب داخل عليا قولتله اني خلاص هروح وهسمع الكلام قالي عارف وراح مديلي سيجاره وقالي انت خايف ليه دي عمليه بسيطه وهتخلي مستر مارك مبسوط منك اكتر وقالي اني هاخد في العمليه دي مليون دولار الرقم زغلل في عيني انا بقى لي سبع شهور شغال معاهم يادوب قربت من الرقم ده دلوقتي هاخده مرة واحده
المهم الصبح جاكوب وصلني المطار وحضني وقبل ما يسيبني همس في ودني وقالي رجالتنا في كل مكان لو فكرت تهرب او تلعب بديلك هجيبك ومش هرحمك وبعدها قام باصصلي ومبتسم وطبطب على كتفي ركبت الطيارة واول ما وصلت المطار بدات افتكر ذكرياتي القديمة كلها بس على قد ما اقدر كنت بحاول ما افكرش العمليه هتتنفذ بكرة وبعد بكره هرجع امريكا
وصلت قدام بيتي اخيرا الوقت كان متاخر الساعه 3 بليل خبطت على باب بيتنا وانا مستني امي تفتح ما قولتلهمش اني راجع امي فتحتلي فعلا اول ما شافتني فضلت مبرقة وقامت معيطه وحضناني معرفتش امسك دموعي انا كمان وبعدها لقيت الحج خدته بالحضن هوا كمان واضح ان عفش الشقه كله اتغير فعلا والبيت بقى شكله اجمل
ابويا وامي فضلوا يحكولي عن قد ايه الناس كلها في المنطقة فرحانه ونفسهم يشوفوني وقالتلي انها رايحه بكره تزور خالتي عشان تعبانه وقالتلي اجي معاهم هتفرح اوي لما تشوفني قولتلهم انا مش فاضي عندي شغل لازم اخلصه بكره وبعدها هبقى اقعد مع الناس كلها طبعا ما قولتلهمش اني جاي يومين وماشي والا ماكنتش امي هتسيبني انزل من البيت اليومين دول قولتلهم جاي اسبوعين دخلت الاوضه بتاعتي لقيت الصور اللي ملزقها على الحيطان وهدومي القديمه والسرير مترتب الحجه عمرها ما قصرت معايه حتى وانا مش موجود فتحت درجي محتفظ جواه بحاجات كتير قديمه بعدها تلفوني رن فصلني عن كل ده رديت رد عليا واحد قالي الشنطة هتلاقيها في العنوان ده وقالي عليه وقالي لازم اروح هناك الساعه 4 العصر عشان انفذ العمليه واركب طيارة بليل على طول .. طلعت سيجارتي اللي مخبيها في شنطتي جبت واحده بس عشان اعرف اخبيها وشربتها في البلكونه وبعدها نمت
لقيت أمي بتصحيني الساعه 1 عشان اتغدى معاهم انا نسيت أضبط المنبه بتاعي عشان اصحى بدري اتعودت ان جاكوب بيجي يصحينا كلنا قالتلي تعالى اتغدى وشميت ريحة المحشي والاكل اللي بحبه كله قولتلها انا متاخر جدا يا امي قالتلي انا كنت هنزل لخالتك من بدري وكنا مستنينك تصحى عشان نتغدى مع بعض قبل ما ننزل.. قولتلها خليها بليل وبصراحه ما قدرتش اقاوم خدتلي صوباعين محشي عالماشي كده وقبل ما انزل بصيت على ابويا وامي بسرعه مش عارف لما ارجع امريكا هرجع تاني ولا لا بس كان في حاجات كتير عايز احكيها وحاجات في درجي نفسي اشوفها وما لحقتش
المهم سيبتهم ونزلت ووصلت المكان اللي هاخد منه القنبله وفعلا الساعه 4 جاتلي مكالمه اني استلم ..روحت خدت شنطه سودا لقيتها في المكان المتفق عليه واتحركت على المكان اللي هنفذ فيه العمليه منطقة شعبية شويه بس جنب مناطق حساسه في الدولة  استنيت هناك شويه وبعدها وجالي تلفون اني انفذ .. للحظات كده دماغي بدات تفكر بس اتعلمت حاجه.. الشغل بتاعي ده مافهوش تفكير نفذ على طول وهتنسى مع الايام المهم فتحت الشنطه وبالفعل فعلت القنبله وسيبتها
العد اشتغل على طول فاضل 59 ثانية
سيبتها وطلعت اجري بكل قوتي بجري بعيد على قد ما اقدر بس حصل حاجه عمري ما كنت اتخيلها لدرجه اني فكرت اني بحلم لمحت حاجه جنب القنبله على طول معقولة اللي انا شوفته ده مافيش وقت ارجع اتاكد المهم ضميري هيموتني طول عمري لو مارجعتش.. رجعت بسرعه وانا عارف ان فاضل اقل من 40 ثانية بالفعل هوا التاكسي اللي لمحته مزنوق في الزحمة هناك هي أمي وأبويا راكبين فيه من غير تفكير طلعت أجري عليهم وانا بصرخ أمي مش سامعاني في الدوشة اللي موجوده وكلكس العربيات وانا بجري عليهم شريط حياتي عدى كله قدام عيني
لحظة دعاء امي ليا وانا صغير السندوتشات اللي جابتهالي للاوضه وانا بذاكر في الثانوية أبويا وهوا بيوصلني للامتحان .. البدله اللي كان نفسي فيها وابويا جابهالي بدم قلبه عشان مشروع تخرجي فرحتهم اول ما اشتغلت الفلوس اللي ادهوالي عشان اسافر الحضن اللي خدته منهم اول ما جيت صحابي قرايبي جاكوب مستر مارك الكسندرا الواد المكسيكي صحاب الجامعة القنبله كله بيعدي قدام عيني
أمي بصتلي اخيرا وشافتني وبتشاورلي ونزلت من التاكسي مافيش وقت بصتلي وروحت مغير اتجاهي للشنطه اللي فيها القنبله فتحتها لقيتها الثانية 5..4..3 ..بصيت لأمي وهي واقفه من بعيد وحركت شفايفي بكلمة أسف  .....
(قصة عصابات المافيا )
النهاية
#بقلم_عمر_ليمونه