قصة اللعينة 📖الجزء الثالث و الاخير

أنا مش فاهم ايه سيلفيا دي بس كل اللي سامعه صوت فحيحها سيلفيا سيلفيا وفجأة بدأ يخرج من بوقها حشرات سوداء لحد ما كل أجزائها إتحولت لحشرات وخرجت من الشباك بدأ قرآن الفجر قدامي وقت أخد فيه نفسي أنا إزاي ورطت نفسي في كل ده انا غبي
فتحت اللاب وبدأت ابحث عن إسم سيلفيا ملقتش أي حاجه أنا مش فاهم أنا حضرت ايه بالظبط السر كله عند مها هي الوحيدة اللي تقدر تحدد ايه اللي حصل 
لقيت رسالة منها " انا اسفة علي اللي هقوله بس أنا ارتكبت معاك غلطة كبيرة أنا منضمة لطائفة عبدة الشياطين واسمي الحقيقي هو سيلفيا إحنا طائفة بنعبد شيطانة إسمها ليليث أقوي شيطانة في بني إبليس جالبة المرض والموت أنا اديتك التعويذة اللي تحضرها بيها وأنا قاصدة لأنك أضحيتي الجديدة نسيت أقولك إن كل فترة لازم نقدم قرابين  ليها عشان تتركني نعيش في سلام وإنت كنت أضحيتي الجديدة القربان اللي هقدمه ليها عشان أعيش بسلام وأنت كنت صيد سهل جداً عرفت عنك كل حاجه من خلال جلسة تحضير من جلساتي كنت عارفة إنه سهل أضحك عليك ونجحت فعلاً بكل سهولة مفيش قدامك حاجه تعملها للأسف إنت إستدعيتها عشان تاخد روحك وهي جت أنا هحاول تكون موتك سهلة وبدون ألم مع إني أستبعد إن ليليث هتموتك ببطئ أنا آسفة بس أنت اللي غبي
وداعاً يا عزيزي " .....
انا قريت الرسالة ومش عارف أعمل أيه أنا خلاص هموت ومش في إيدي أي حاجه أعملها أنا كنت قربان غبي أضحية لساحرة مجنونة ومن ليليث دي ازاي أنقذ نفسي منها
كانت دماغي هتنفجر من التفكير نمت غصب عني وانا بفكر اعمل ايه لما صحيت ضحكت علي نفسي تقريبا دي أخر مرة هنام فيها للأسف صحيت أعمل بحث عن لعنة ليليث  وبعد ساعات مفيش حل مفيش أي حل أنا خلاص هموت ودي النهاية خرجت من بيتي للمكتبة العمومية اللي في اخر الحي أشوف أي كتاب ممكن يكون عنها خصوصا إني عرفت إنها شيطانة قديمة في أساطير بلاد الرافدين بتيجي مع الرياح وبتسبب المرض والموت
انا مش عايز أموت لازم ألاقي حاجه تخرجني من المأزق ده
بعد ساعات في المكتبة برده ملقتش أي معلومة زيادة عنها قررت ارجع بيتي واللي يحصل يحصل ما هو أنا مفيش في إيدي حاجه أعمالها خرجت من المكتبة وبدأت أمشي  في الشارع راجع لبيتي كانت الشوارع فاضية بشكل غريب شارعنا دائما مزدحم السكان هنا مش بتنام بس أيه الهدوء ده منكرش بدأت أخاف خصوصا وانا سامع صوت خطوات بطيئة ورايا وكل ما ألتفت ملاقيش حد بدأت أسرع في خطواتي والصوت ورايا بقي أسرع جريت كأني بهرب من الموت دخلت بيتنا قفلت الباب صوت الخطوات توقف وبدأ صوت طرقات عنيفة علي الباب ومن تحت الباب كان باين خيالها وجزء من شعرها  دخلت أوضتي وقفلت الباب عليا كأنها مش هتعرف توصلي بس أنا مش عارف أحمي نفسي بطريقة غير كده سمعت صوت باب الشقة بيتفتح انوار الصالة إتطفت صوت خطواتها التقيل ناحية أوضتي صوت شعرها وهو بيزحف علي الأرض ببطء بدأت تخبط علي باب أوضتي الإضاءة بترتعش بتنادي بإسمي مازن ..... مازن
ضحكاتها بتعلي اكتر واكتر صوتها بدأ يتحول لصراخ مخيف صوت فحيح الافعي بدأ يعلي الباب إتفتح بقوة كانت بتقرب مني وجنبها أفعي ضخمة بدأت أرجع لورا ناحية الشباك وهي بتقرب أكتر لفت شعرها علي رقابتي والافعي غرست أنيابها في رجلي بدأت أصرخ من الألم وأحاول أفك رقبتي معرفتش الافعي بدأت تزحف علي جسمي بدأت أصرخ من الألم الافعي دخلت في بوقي أيوه أنا بلعت أفعي لشيطانة حضرتها أنا عملت كده ليه فكيت شعرها من رقبتي ورجعت ناحية الشباك ورميت نفسي الموت في الحالة دي اهون منها اخر حاجه شوفتها كان منظرها وهي واقفة في الشباك بتبتسم بشر فقدت الوعي قبل ما ارتطم بالأرض من حسن حظي لما صحيت كنت لسه عايش للأسف قالوا اني عندي كسور وكدمات بسيطه بالنسبة لواحد وقع من الرابع ودي معجزة غريبة محدش فاهمها والغريب أكتر إن الدكاترة بلغوني إني مريض أبوه مريض بمرض نادر اول مره يظهر في العالم في حاجه بتنهش خلاياي من جوه كل الخلايا اللي في جسمي بتدمر بشكل بطئ وبيتنشر نوع معين من السم في جسمي مانع الجسم أنه يكون خلايا جديدة هما مش عارفين السبب بس أنا عارف كان المفروض أموت بعد عدة أيام بس أنا لقيت الحل وأنقذت نفسي
أنا أنضميت لطائفة سيلفيا وإخترت أكون من عبدة ليليث الشيطانة وبدأت العب اللعبة اللي سيلفيا بدأتها معايا وبقيت أنا اللي بختار الضحايا ضعاف النفوس اللي الفضول قاتلهم وعايزين يجربوا المجردين من الايمان زيي اللي عندهم إستعداد يعملوا أي حاجه عشان يعيشوا عشان كده نصيحتي ليكم بلاش تمشوا في  طريق مش عارفين نهايته بلاش تدخلوا عوالم ربنا أراد تكون خفية عنكم بلاش تقتحموها بكل غرور وكأنكم عارفين كل حاجه لأن النهاية هتكون سيئة جدا لأن الطريق اللي أوله شر أخره شر أكبر  إحذروا ............

#اللعينة
#الجزء_التالت
Hadeer_saeed