قصة ❤ الجزء الاول ❤

انا ياسمين مش قادرة انسى اليوم اللي اختفى فيه أمير ابن عمي أصغر حد في عيلتنا
يجي من عشرين سنة تقريباً ساعتها كان عندي تسع سنين واخويا علي ١٣ سنة كنا ساكنين في بيت قديم جداً بتاع والد جدي ومعانا عمي اسامة عندة شريف ١٢ سنة وعمر ١٠ سنين وكمان عمي شهاب عنده أمير خمس سنين وطبعاً مرات كل حد فيهم واكيد طبعاً جدي .
بيتنا كان فيه أوضة عمرنا ما شوفناها مفتوحة ولا حد دخلها كل اللي نعرفه عنها إن مفتاحها مع جدي ودايماً يقولنا ما حدش يدخلها سألنا كتير والدينا عنها بس ما حدش قالنا حاجة وقالولنا إن هما كمان عمرهم ما دخلوها ولا يعرفوا فيها اية .
في يوم من الايام كنا بنلعب انا واخويا وعيال عمي الفضول كان واكلني هاموت واعرف ايه اللي في الاوضة ايه الحاجة اللي جدي مخبيها جواها ومش عايزنا نشوفها
وطبعاً لاني البنت الوحيدة في البيت ومحدش منهم بيزعلني وباقدر اقنعهم باللي عايزاه اقنعتهم ندخل الاوضة المقفولة وخصوصاً أن اهالينا في الشغل واحنا في إجازة يعني نقدر نعمل كده من غير ما حد يعرف، وافقوا كلهم على الفكرة بس الباب كان مقفول بقفل صعب نفتحه وقفنا كلنا قدام الباب حيرانين عمر قالنا ان جدي عنده مفاتيح كتير في اوضته اكيد واحد منهم هايفتح فقررت اني اروح أنا الأوضة واجيب المفاتيح فضلت ادور لحد ما لقيتهم اخدتهم وجريت ودخلت عليهم وانا باتفشخر بنفسي وكأن انتصر في حرب مسك علي المفاتيح وابيتدا يجرب واحد ورا التاني واحنا املنا بيقل مع كل مفتاح بينقص خلصت كل المفاتيح من غير ما الباب يتفتح فضلنا نبص لبعض واحنا مش عارفين نعمل ايه لحد ما افتكرت اني مرة شوفت جدي بيحط مفتاح جوه علبة وبيحطها في الدولاب بتاعة كأنه بيخبيه جرينا تاني على أوضة جدي شاورتلهم على الدلفة اللي محطوط فيها المفتاح بس كانت مقفولة دورنا في المفاتيح اللي معانا لحد ما اتفتحت وطبعا انا عارفه مكان العلبة اللي لقناها مقفولة بقفل صغير زي ما كل حاجة في اليوم ده مش بنلاقيها مفتوحة شريف جاب حاجة مش فاكرة ايه هي بس فاكرة إن العلبة اخيراً اتفتحت وطلعنا منها  المفتاح وفتحنا اخيراً القفل بتاع الاوضة المقفولة بس مفصلات الباب بتاعها كانت ناشفة جداً مش عارفين نحركه جمعنا كل قوتنا وابتدينا ندوس كلنا على الباب لحد ما اتفتح ووقعنا كلنا على الارض اللي كان عليها كمية تراب مش طبيعية هدومنا كلها بقت تراب ما كانش فيها نور شغل علي الكشاف عشان نقدر نشوف ايه اللي مخبيه جدي .....

#ليلةعصيبة
#جيكيناز_جورج