بوستات مكتوبه

🌻 حاجات مش مقبولة في فترة الخطوبة وبتدل على عدم صحية العلاقة :

* الراجل اللي بيشتمك أو بيهينك ، او بيمد ايده عليكي مهما كان الخلاف كبير ، ده هيتضاعف بعد الزواج ويا اما هتطلقي او هتعيشي مهانة معاه .

* الراجل الكذاب ، كل حياته تحوير ومش واضح ، وبيحكيلك الموضوع كل مرة بشكل مختلف ، ودايما حججه مش منطقية وماتتصدقش .

* الشكاك ، اللي بيشك في أصغر تصرف بتعمليه وده يا إما بيحبك حب مرضب يا إما حياته مليانه بلاوي وشايف ان مراته هتطلع زيه وانها مخبيه حاجه على طول ، هتعيشي في جحيم ، اهربي .

* الشخصية المسيطرة بشكل لا يطاق ، القوامه حق للراجل وكلمته تتسمع وطاعته واجبه👌 ، بس في حاجه اسمها نقاش ، وماتكنش السيطرة في الامور الشخصية جدا ليكي او تحكم في امور الطبيعي تكون مباحة ليكي بدون مبرر ، هتعيشي في سجن .

* اللي زعله بيكون بجفاء ، مايكلمكيش لاسبوع او شهر عشان زعلان ، ده مالكيش أي خاطر عنده وبتهوني عليه ببساطة ، والفجوة هتزيد مع الوقت .

* متعدد العلاقات قبل الجواز مش هيتصلح ولا هيتغير بعد الجواز ، الا لو ربنا تاب عليه .

اخيرا عمر الشخص ما هيبقى كامل وممكن في بعض المواقف يطلع منه حاجه من اللي فوق دي بس مايكنش ده سمت الشخصية وطبيعته في كل وقت 👌 .