بوستات مكتوبه
> صباح الخير يا دكتور شريف
عايز اجبلك خالتي يا دكتور تكشف عليها هي تعبانة وبصراحة خالتي دي مربياني بعد وفاة أمي الله يرحمها وقاعدة معانا في البيت
طب يا صابر هي عندها ايه وبتشتكي من ايه
> والله يا دكتور شريف مش عارف بالظبط بس عندها القلب باين ومش فاكر عندها ضغط او سكر مش فاكر أوي بصراحة
مش ملاحظ حاجة يا صابر
> اه فهمت يا دكتور انت قصدك عيد الام قرب ولازم اجبلها هدية
لا يا صابر انت فهمتني غلط
>طب ايه يا دكتور شريف مَش فاهم
يا صابر خالتك مربياك ومعاك في البيت وتعبانة وانت مش عارف مريضة بايه وطبعا مش عارف بتاخد ادوية ايه ولا اي حاجةً بالتفصيل عن مرضها
> يا دكتور شريف انا عندي شغل طول اليوم وانت فاهم
يا صابر اقل حاجة تعملها قبل متفكر تجيب هدية
انك تعرف ست الكل صحتها ايه وأخبارها ايه وعندها ايه وبتاخد الدواء ولا مش بتاخد الدواء وايه الجرعات والادوية كلها
> يا دكتور شريف في ناس اصلا ميعرفوش اي حاجةً عن مرض امهاتهم يعني كتر خير الدنيا اني عارف ان عندها القلب
فكرتني يا صابر من يومين شفت بنت داخلة مع أمها في العيادة وامها بتحكيلي عن شكوتها ومن اول ماكشفت لغاية ماخلصت كشف لاقيت بنتها ماسكة الموبيل على الفيس ولا تعرف أى حاجة عن مرض أمها وكنت حاسس بجد ان الام لوحدها تماما وان بنتها في عالم تاني
وشفت بعدها مريضة تانية مع بنتها
ولاحظت ان بنتها عارفة الدواء بتاع امها بالتفصيل وكانت مهتمة جدا وبصراحة اتفاجأت لما عرفت ان الست دي مش امها وطلعت حماتها وطبعا لاقيت الست بتدعي لمرات ابنها بحرقة وبحب ودعتلها دعوات تخليك تبكي من الوفاء والعطاء
والله لو الناس تعرف الدراسات بتقول ان السيدات اكثر عرضة للوفاة من الرجالة بسبب الازمات القلبية بعد عمر ٦٠ سنة ، وفِي نظريات بتقول إن من اهم أسباب ده هو عدم المعرفة وإهمال الأبناء والمحيطين بالام
>طب يا دكتور شريف أعمل ايه دلوقتي
روح يا صابر قبل ماتجيب هدية في عيد الأم
اعرف ست الكل صحتها عاملة ايه واعرف كل صغيرة وكبيرة عن مرضها وبتاخد الدواء ولا مش بتاخده وكل التفاصيل دي
ست الكل مش عايزة هدية منك
ست الكل عايزاك تكون اتغيرت وحسيت بوجعها وبالمها
وبدوائها وبمرضها
وأعظم هدية عندها في عيد الام
انت يا صابر
انت الدواء وانت الهدية
#ما_أعظم_ان_تكون_غائبا_حاضر
#على_أن_تكون_حاضرا_غائب
التعليقات على الموضوع