bostat

-واحدة بتلبس بناطيل و بتنصح صاحباتها بإنهم يلبسوا واسع و طويل...فقالوا ما تروح تنصح نفسها أول..ما تبص لنفسها أول..و مقبلوش النصيحة
-شاب بيشرب سجاير و بيقول لأصحابه بلاش تشربوها والله مضرة بالصحة جدًا و هو خايف عليهم..بيردوا و يقولوا ما ينصح نفسه أول
-واحدة كانت بتتخانق مع جوزها كتير و اتطلقت بس لما شافت صاحبتها اتخانقت مع جوزها قعدت تنصحها بإنها لازم تحافظ على بيتها من الدمار فقالتلها كنتى انصحى نفسك أول قبل الناس و كنتى حافظى على بيتك
-شاب مقطع فى الصلاة بس بيشجع أصحابه على الصلاة فى وقتها فواحد من أصحابه قاله ابقى روح شجع نفسك أول

ثانية كده..

*البنت اللى بتلبس بناطيل دى نفسها تلبس واسع جدًا بس أهلها مش معودينها على كده و هى نفسها تاخد الخطوة و بتشجع نفسها و بتحاول و بتجاهد لأنها الوحيدة اللى بتشجعها محدش واقف معاها فبتاخد خطوة خطوة و لما عرفت جمال الطويل حبت انها تشجع و تنصح صاحباتها
*الشاب اللى بيشرب سجاير ده صحته تعبت أوى و بدأ يجاهد مع نفسه إنه يبطلها و بقا بيشرب فى اليوم واحدة و لا اتنين بعد ما كان بيخلص علبة وقف جنب نفسه و سند نفسه لحد ما يوصل لإنه يبطلها خالص
*الواحدة المطلقة دى طليقها كان بيعاملها وحش أوى و بيضربها و بيهينها فاتطلقت لكن صاحبتها اتخانقت مع جوزها بسبب تافه فنصحتها إنها تحافظ على بيتها لأنها جربت خراب البيت بيكون إزاى و بالذات ده سبب تافه و حرام يدمروا بيتهم علشانه
*الشاب المقطع فى الصلاة ده مكنش بيصلى خالص بس ربنا هداه و بقا بيركعها و بيجاهد نفسه علشان يكمل و لما داق حلاوة الصلاة طلب من اصحابه و شجعهم عليها بس سخروا منه

.....
أحيانًا بنبقى نفسنا فى حاجات و بنكون مش قادرين نوصلها بس لما جربنا حلاوتها بنتمناها لحبايبنا بس حبايبنا بيفاجئونا بأنهم يضربونا مثال لنصيحة مننا ليهم..
بنمشى ساعات بمبدأ(يسروا و لا تعسروا) بس هما اللى بيخلوا الموضوع عسير علينا و يكسروا بنفسنا قصادهم

°°نصيحة..أول ما تلاقى حد بينصحك بحاجة حلوة و هو بيعمل عكسها مش لازم يكون نفاق لأنه ممكن يكون داق حلاوة البعد عنها و نفسه يبعد بس مش قادر لسه....يسروها على بعضكوا يا جماعة

ريهام يحيى