أحمد :إنتي يا ست ياللي هنا
سارة :نعم يا بيبي
أحمد :فين القميص الأسود بتاعي
سارة :علي الحبل .....
أحمد : وبيعمل ايه علي الحبل بقاله أسبوع ان شاء الله
سارة : مشنوق
أحمد : انتي هتهزري
سارة : آمال اسيبك تهزر لوحدك
أحمد بالراحة كده فهميني هدومي ليه مش في الدولاب
سارة : في قانون في الفيزياء يا حبيبي بيقول ان الجسم الساكن بيفضل ساكن مدام مفيش قوة اثرت عليه
أحمد : يعني ايه مش فاهم ؟!!
سارة : نسيت انك كنت أدبي ، يعني يا بيبي القميص هيفضل مكانه علي الحبل لحد ما حد يروح يجيبه
أحمد : أيوه مفهمتش وانتي مجبتيش القميص ليه ؟!
سارة : بص يا حبيبي الدنيا مش مستاهلة نضيع فيها وقت علي حاجات تافهة ، يعني انا المفروض ألم الغسيل واطبقه واحطه في الدولاب وبعدين انت تيجي تلبسه فيتوسخ تاني وارجع اغسله واحطه ينشف ، هضيع عمري في الغسيل يعني
أحمد : أيوه والحل يعني متغسليش
سارة : ليه حد قالك اني معفنة ، الحل نوفر شوية وقت من الحاجات التافهة دي ، الهدوم تفضل علي الحبل واللي عايز حاجه ياخدها علي الأقل مش هتحتاج مكوي ونبقي وفرنا وقت أكبر
أحمد : طيب وبالنسبة للغداء
سارة : بص يا حبيبي ،طبعا إنت راجل مؤمن وعارف ان ثلث لطعامك وثلث لشرابك وثلث لنفسك
أحمد : عارف الحمد لله ، بس ده معناه ايه ؟!
سارة : في سندوتش جبنة في التلاجة تملي بيه ثلث الأكل وكوباية عصير وخليك خفيف كده
أحمد : يعني مفيش غدا ؟!!
سارة : إحنا قولنا ايه يا حبيبي انت راجل مؤمن
أحمد : طيب انتي ست مؤمنة طبعا يا بيبي وموحدة بالله
سارة : طبعا يا حبيبي الحمد لله
أحمد : وزي ما انتي عارفة ان شرع ربنا مفيش عليه خلاف
سارة : أيوه طبعا
أحمد : طيب وانا قررت اطبق شرع ربنا واتجوز عليكي يا بيبي
سارة : قولتلي بقي عايز القميص الأسود ولا الكحلي !!!
#Hadeer_saeed
الاشتراك في:
تعليقات الرسالة
(
Atom
)
التعليقات على الموضوع