قصة ❤❤

كنا قاعدين بنسمع اغاني ..
معرفش ايه خلاني اسألها السؤال دا بس لما لقيتها مندمجة مع اللحن كإنها بترقص معاه مقدرتش امسك لساني وطلع مني السؤال فجأة :هو انتي لسه بتحبيه ؟
بصتلي وابتسمت وقامت قفلت الكاسيت ورجعت قعدت قدامي ، معرفش ليه حسيتها هتقول كلام مش هيعجبني وفعلا بدأت كلامها بسؤال : سمعتي عن الجملة اللي بتقول علي قد المحبة بيكون العقاب ؟
هزيت راسي بما معناه إني اه اعرفها قالتلي جميل ، انا بقا مكنتش بصدق في الجملة دي ،يمكن عشان مرفعتش سقف المحبة لحد قبل كدا لدرجة إني ادوق منه العقاب ، أو يمكن انا متعاقبتش اوي للدرجه اللي تخليني اصدق في الجمله ..
بس عرفتها ، عرفتها وجربتها
لما قابلته هو ..
رفعت سقف محبته جوايا للحد اللي خلي المحبة تنهار فوق دماغي ..
وعلي قد محبتي كان العقاب .
عقاب اشبه بالسم ، سم بيجري جوايا ومازال ومش قادرة الاقي المصل اللي يشفيني منه .
قولتلهاله مرة .. انا قلبي مغروس في ارضك ، جذوره ممتدة ومتشعبة جوا أرض حبك البور المالحة .
كل يوم ازرع وعود فيها علي أمل إنها هتبقي احسن وهتتغير مع إني عارفه إنها أرض مش هتطرح غير الوجع عشان هي تربة مالحة .. 
لحد ما الجذور ثبتت اكتر واكتر
علي رأي اللي قال مادام التربة مالحة ليش عم نزرع وعود يعني ولا احنا غاويين نعدم قلوبنا بإيدينا ؟
انا غرقت في حبه لحد ما عديت البراميل وبقيت في عرض البحر ..
بسأل نفسي كل ليلة اشمعني هو ؟!
اشمعني هو سلمته قلبي يكسره ؟  يكسره ويموته ويمشي في جنازته وانا موافقة بمنتهي الانهزامية ؟
لسه بحبه ؟ دا سؤال ولا إجابة ؟
هو حاضر معايا في كل حاجة ..
طيفه ملازمني ، ضحكته ، حركة حواجبه ، طريقته المستفزة وهو بيتكلم ، لمعة عينيه ، كل حاجة جوايا ..
سألتها طب وهو ؟
قالتلي بكل استنكار هو ؟!!
هو الجلاد ،  لأ .. هو القاضي والجلاد .
هو المحكمة كلها بذاتها ..
تعرفي انا في جملة بتوجعني دايما لما بشوفها اللي بتقول  وكنت احسب انني لا أهون وهنت ..
بفتكر قد ايه هو كان قاسي .
قدر يزرعني جواه  ..
وبمنتهي القسوة موتني جوا ارضه ..
تعرفي اني كنت دايما كان ببقي عارفة انه من قبل ما يوعد كداب ؟
بس كان جوايا حاجة هبلة بتقولي صدقيه عشان هو ابنك ، ومفيش ام بتكذب ابنها ..
غيري السيرة عشان مش حابه اغيب عن الواقع دلوقتي ..
ضحكت ضحكة هادية وقولتلها ايوه يعني بتحبيه ؟
ضحكت وقالتلي عارفاكي بتحبي تسمعي الرد بالاغاني ..
انا حبيته وبحبه وهحبه علي طول ⁦⁦❤️⁩

رأيكو ⁦💮⁦❤️⁩