قصة اللعينة 📖الجزء الاول

ازيكم أنا مازن حابب أحكي لكم حكايتي وبعدها هختفي للأبد بس لازم أنصحكم عشان محدش يغلط غلطتي  ، من سنة تقريبا كنت في جروب شبه ده جروب للأشياء الخارقة بنتكلم فيه عن الجن والسحر والكائنات اللي الإنسان لسه ميدركش وجودها الجروب مسلي جدا وجميل بينزلوا حاجات مختلفة ومرعبة فعلا
كانت هوايتي المفضلة أفضل أقلب في الجروب لحد ما أنام وفي يوم كانت بنت منزلة فيديو لجلسة تحضير أرواح ليها هي واصحابها الفيديو كان حقيقي جدا ومبهر علي قد ما خوفني علي قد ما بهرني عمري ما شوفت حاجه بالإتقان ده ولا الرعب ده بعتلها رسالة اسألها هي إزاي عملت الفيديو بالإتقان ده
مردتش علي الرسالة قفلت ونمت
الصبح لقيت رسالة منها محتواها " حابب تجرب"
خوفت شوية ما أنا أكيد عمري ما تخيلت إني ممكن اجرب أنا أخري أتفرج بس معنديش الجرأة والشجاعة اني اعمل كده بس الفضول قاتلني رديت عليها " إزاي "
موصلنيش اي رد منها فضلت طول النهار بحاول اشغل نفسي ومفكرش فيها ولا حتي انتظر رسالتها بس حقيقي كنت مستني رسالتها جدا في منتصف الليل ومع دقة الساعة علي ١٢ بالظبط وصلت رسالة منها قالت : الأول أعرفك بنفسي أنا مها مصرية بس  مهاجرة بقية التفاصيل هتعرفها بعدين .......
أكيد انت خايف دلوقتي تسألني عن جلسة التحضير عشان انت خايف تجرب أنا مقدرة ده ومقدرة إنك عمرك ما جربت ومعندكش الشجاعة لكده
قولتلها : إنتي .... إنتي إزاي عرفتي حاجه زي دي
قالت : أنا اعرف عنك كتير جدا اكتر من اي حد ويمكن أكتر منك شخصياً
قولتلها : بس إزاي ؟!!
قالت : مش مهم هتعرف بعدين أنا هقفل دلوقتي عندي شوية طقوس لازم أعملها
قفلت وقتها وأنا محتار ومش عارف أنا رايح فين من ناحية الفضول ومن ناحية خايف أنا عمري ما كنت شجاع ، بس دي مكنتش اخر مرة نتكلم فيها بقينا نتكلم كل يوم تقريبا كانت دايماً بتخمن أنا بعمل أيه أو عملت أيه حبيت اللعبة كنت أول ما أكلمها أسالها تفتكري عملت ايه إنهاردة ؟!
وكانت بتخمن كل مرة بإمتياز علاقتنا بقت افضل كتير وبقي وجودها أساسي نسيت الفيديو ونسيت التحضير  لحد ما في يوم بعتتلي رسالة وقالت : بكره أول الليالي القمرية أنسب وقت للتحضير ده وقتهم إنت بكره هتبدأ أول الطقوس
قولتلها : طقوس أيه لا انسي ده كان فضول
قالت : أنت خايف بس متقلقش هابقي معاك دايما وجنبك وهساعدك هخليك تسخر فرد منهم يلبي كل طلباتك
وافقت تحت ضغط وإلحاح منها وقالت إنها بكره قبل منتصف الليل هتبعتلي كل التفاصيل عن أول طقس هعمله بس لازم استعد
حقيقي أنا مش عارف المفروض أستعد إزاي يعني أنا المفروض أعمل إيه استنيت الرسالة وقبل منتصف الليل بعدة دقايق بعتت الرسالة دي " كلها دقايق علي منتصف الليل خد شمعة وسكينه وكأس معدن وملح واكتب التعويذة دي في ورقة  خليها معاك اوعي تنساها
اطلع علي المقابر اللي بعدكم بكام شارع واعمل اللي موجود في الرسالة بالظبط واوعي تفتح عنيك اوعي ...
خدت كل الحاجات دي وروحت المقابر الطريق ضلمة صوت نباح كلاب وصوت خناق قطط اضواء الشوارع بدأت تهتز وتضعف أنا خايف أنا عايز أرجع سمعت صوت همس في ودني بيقول مبقاش ينفع الرجوع أوعي ترجع
كنت ماشي وسامع خطوات ورايا صوت الهمس بيعلي في ودني الاصوات كلها هدأت اول ما دخلت المقابر مفيش غير صوت خطواتي وصوت الخطوات اللي حاسس بيها ورايا دخلت المقابر بدأت أنفذ اللي هي قالته في الرسالة اعور إيدي واخلي دمي ينزل في الكأس وأقرأ كلمات هي محدداها من الورقة اول ما بدأت أقرأ الكلمات الدم بدأ يزيد في الكأس فجأة الكأس إتملي عملت الخطوة التانية وبدأت أرسم الطلاسم اللي بعتتلي أشكالها بالدم اللي في الكأس وحطيت الشمعة في وسط نجمة داوود اللي رسمت جواها الطلاسم وبعدها بشوية عملت دايره حوالين نفسي بالملح دايرة مغلقة تماماً وبدأت اقرا التعويذة اللي بعتتها صوت الرياح إشتد الرعد والبرق بدأ وفجأة صاعقة ضربت الدايرة إشتعلت هي قالت دي علامة علي حضورهم فلازم أغمض عيني واردد التعويذة غمضت عيني وبدأت أردد التعويذة مرة واتنين وتلاته بدأت أسمع أصوات همس حواليا ناس بتتحرك حركة سريعة وبطيئة وسمعتها بتهمس لي أفتح صوت ضحكات عالي البرق والبعد بيضرب كل مكان صوت الرياح أعلي انا خايف أنا ليه عملت كده أنا عايز أهرب ........
#اللعينة
Hadeer_saeed